反對「逃犯條例」修訂
漏洞漏洞漏洞，有無咁多法律漏洞；
誤解誤解誤解，有無咁多語言誤解；
公義公義公義，政府口中嘅公義唔係市民大眾理解嘅公義。
堵塞「漏洞」，變成欲蓋彌彰；
消除「誤解」，變成愈描愈黑；
彰顯「公義」，變成死者可能永不沉冤得雪。
但凡港府、高官、權貴、既得利益者話係啱，連成一氣，正義上身，大義凜然，捨我其誰，要求立法會匆匆通過，其他持異議嘅香港人、民主派議員、12位前任現任大律師公會主席、西方民主國家嘅言論評語意見，就係大錯特錯，不足一哂，雙方壁壘分明，明眼人就知道，呢啲所謂「漏洞誤解公義」，梗有大問題。
法律面前，人人都有免於恐懼的權利，連律師代表同家屬探視權都無，你要埋我份。
諮詢諮詢諮詢，撤回撤回撤回，堅決反對「逃犯條例」修訂。
後記：
唔怕一萬，只怕萬一，美國取消香港政策法，獨立關稅區「被注銷」，香港政府有無Plan B安定民心？樓價股價匯價有無可能好似食咗瀉藥咁，一瀉千里？
後後記：
早輪有大學同學問我，願唔願意參加聯署反惡法，我咁懶，無乜表示，不嬲唔鍾意大棚行動，希望同學仔睇到呢篇文，喺呢度講聲唔好意思，sorly。
Search